اُن کا نام سنتے ہی بے قرار ہوتا ہے 

اُن کے ہر اشارے پر دل نثار ہوتا ہے

جب تمہارے چہرے سے اُس کی آنکھ اٹھتی ہے

رخ تمہارے عاشق کا سوئے دار ہوتا ہے 

وہ جسے جہاں سارا غم گسار کہتا ہے

کون ایسے بے کس کا غم گسار ہوتا ہے 

اُن کو میرے وعدوں پر کچھ یقیں نہیں ہوتا 

بس عدو کی باتوں پر اعتبار ہوتا ہے

اپنے ہاتھوں سے جب وہ مہ لقا پلاتا ہے 

زہر زندگی کا تب خوش گوار ہوتا ہے 

وہ مرا بتِ کم سن مانتا نہیں لیکن

میری داستاں سن کر شرمسار ہوتا ہے 

اولِ شبِ ہجراں جب چراغ جلتے ہیں 

اُس گھڑی تصور میں روئے یار ہوتا ہے 

بے کلی کے عالم میں کٹ گئی شبِ وعدہ 

منہ اندھیرے اب کس کا انتظار ہوتا ہے

اُن کے سامنے سمرن چپ رہو تو بہتر ہے

بول کر ذلیل انساں اور خوار ہوتا ہے